29.02.2012, Asekose.am. Ինչո՞ւ չի վերականգնվում Օձունի եկեղեցինAsekose.am - http://asekose.am/2012/02/29/odzun Դեռևս անցյալ տարի մամուլում հրապարակումներ եղան «Օձունի վերածնունդ» ծրագրի մեկնարկի մասին: Ծրագրի նպատակն է հայկական վաղ քրիստոնեության գոհարներից մեկի` Լոռվա մարզի Օձուն գյուղում գտնվող Սբ. Մարիամ Աստվածածին եկեղեցու վերանորոգումը: Այդ առաքելությամբ ստեղծվեց հատուկ հիմնադրամ: Վերջինս դեռևս հոկտեմբերին Օձունի վանքի վերականգնման վերաբերյալ հուշագիր ստորագրեց ՀՀ մշակույթի նախարարության հետ: Ստորագրման ժամանակ հայտարարվեց, որ նոյեմբերին կանցկացվի շինարարական աշխատանքներն իրականացնող կազմակերպության մրցույթ, իսկ այս տարվա սկզբին կկայանա աշխատանքի մեկնարկը: Ինչպես տեղեկացանք հիմնադրամի մամուլի ծառայությունից, առ այսօր որևէ մրցույթ չի հայտարարվել: Ծառայության աշխատակիցը չկարողացավ մեր հարցերին որևէ պատասխան տալ, և ստիպված եղանք դիմելու շահագրգիռ մյուս կողմերին: Սկզբում դիմեցինք Մայր աթոռ Սբ. Էջմիածնի մամուլի խոսնակ Տ. Վահրամ քահանա Մելիքյանին, որը նշեց հետևյալը. «Մայր աթոռի, մշակույթի նախարարության և հիմնադրամի միջև հուշագիր է պատրաստվել, որը ստորագրելուց հետո կսկսվեն վերականգնման աշխատանքները»: Համաձայնագրի ժամկետների վերաբերյալ որևէ բան հայտնել քահանան դժվարացավ: Վերջում զանգահարեցինք Օձունի վերականգնմամբ զբաղվող հիմնադրամի հոգաբարձուների խորհրդի նախագահ, ԽՍՀՄ ժողովրդական արտիստ Սոս Սարգսյանին. Վարպետը պայմանավորեց աշխատանքների ձգձգումը Մայր աթոռի հետ տարվելիք բանակցություններով` վստահություն հայտնելով, որ մոտակա օրերին եռակողմ փաստաթղթի ստորագրումը տեղի կունենա:
|